ખેડામાં જાહેરમાં યુવકોને મારમારનાર પોલીસ કર્મીઓને 14 દિવસની જેલ
ગુજરાત હાઈકોર્ટે ખેડામાં જાહેરમાં માર મારવાના કેસમાં ચાર પોલીસકર્મીઓને 14 દિવસની જેલની સજા ફટકારી છે. હાઈકોર્ટે પીડિતો સાથે સમાધાનની શક્યતા ખતમ કરી નાખ્યા પછી, કોર્ટની અવમાનના અને સુપ્રીમ કોર્ટની ડીકે બાસુ માર્ગદર્શિકાનો અનાદર કરવા બદલ આ સજાની સુનાવણી કરી છે. કોર્ટે ખેડા પોલીસના ચાર પોલીસકર્મીઓને રૂ.2000નો દંડ પણ ફટકાર્યો છે. ચુકાદો આપતાં હાઈકોર્ટે પોલીસકર્મીઓને અપીલ કરવા માટે 3 મહિનાનો સમય આપ્યો છે. ત્યાં સુધી કોર્ટ દ્વારા આપવામાં આવેલી સજા રદ રહેશે. જો પોલીસકર્મીઓ દોષિત ઠરે તો તેઓ હાઈકોર્ટની ડબલ બેન્ચના નિર્ણયને પડકારી શકે છે.
ખેડામાં ગત વર્ષે ગરબા કાર્યક્રમમાં પથ્થરમારાના આરોપીઓને જાહેરમાં માર મારવાના કેસમાં ખેડા પોલીસના ચાર કર્મીઓની મુશ્કેલીમાં વધારો થયો છે. પોલીસે કેટલાક યુવાનોને થાંભલા સાથે બાંધીને જાહેરમાં માર માર્યો હતો. જેના ફોટો અને વીડિયો સોશિયલ મીડિયામાં વાયરલ થયા હતાં.
ગુજરાત હાઈકોર્ટના જસ્ટિસ એ.કે.સુપેહિયા અને જસ્ટિસ ગીતા ગોપીની કોર્ટે ચુકાદો આપતાં કહ્યું કે, કોર્ટ એ વાતથી ખુશ નથી કે તેણે આ દિવસ જોવો પડ્યો અને પોલીસ અધિકારીઓ સામે સાદી જેલની સજાનો આદેશ પસાર કરવો પડ્યો. તેના નિર્ણયની સાથે કોર્ટે ચારેય પોલીસકર્મીઓ પર 2000 રૂપિયાનો દંડ પણ ફટકાર્યો છે. જો તેઓ આમ નહીં કરે તો તેમને વધુ ત્રણ દિવસની સજા ભોગવવી પડશે.
ગયા વર્ષે ગુજરાતના ખેડા જિલ્લામાં 4 ઓક્ટોબરે મારપીટની આ ઘટના પ્રકાશમાં આવી હતી. આ મહિનાની 16 તારીખે પીડિતાઓએ પોલીસકર્મીઓની વિનંતીને ફગાવી દીધી હતી. જેમાં તેણે વળતરની ઓફર કરી હતી. જે પોલીસકર્મીઓ દોષિત ઠર્યા છે અને સજા ફટકારવામાં આવી છે તેમાં લોકલ ક્રાઈમ બ્રાન્ચના ઈન્સ્પેક્ટર એ.વી. પરમાર, સબ ઈન્સ્પેક્ટર ડીબી કુમાવત, હેડ કોન્સ્ટેબલ કનક સિંહ લક્ષ્મણ સિંહ અને કોન્સ્ટેબલ રાજુ રમેશભાઈ ડાભીનો સમાવેશ થાય છે.
