ઇન્ડિયન પ્રીમિયર લીગ (IPL) 2025ની એક રોમાંચક અને નાટકીય મેચમાં સનરાઇઝર્સ હૈદરાબાદ અને લખનૌ સુપર જાયન્ટ્સ વચ્ચે શાનદાર ટક્કર જોવા મળી. લખનૌએ 205 રનનો પડકારજનક સ્કોર ઉભો કર્યો, જ્યારે હૈદરાબાદના ઓપનર અભિષેક શર્માએ આક્રમક બેટિંગથી ટીમને મજબૂત શરૂઆત અપાવી. પરંતુ, મેચની ચર્ચા માત્ર શાનદાર ક્રિકેટને કારણે નહીં, પરંતુ અભિષેક શર્મા અને લખનૌના બોલર દિગ્વેશ રાઠી વચ્ચેની ગરમાગરમ દલીલને કારણે પણ રહી. દિગ્વેશના ‘નોટબુક સેલિબ્રેશન’ અને અભિષેક તરફના ઈશારાએ મેચમાં નાટકીય મોડ ઉમેર્યો, જેનો વીડિયો સોશિયલ મીડિયા પર વાયરલ થયો.

• SRH vs LSG ની મેચમાં જોવા મળી ફાઇટ
• અભિષેક શર્મા અને દિગ્વેશ રાઠી વચ્ચે ગરમાગરમ દલીલ
• લખનૌ સામે અભિષેક શર્માનું વિસ્ફોટક પ્રદર્શન
• દિગ્વેશનું નોટબુક સેલિબ્રેશન બન્યું વિવાદનું કારણ

Abhishek Sharma and Digvesh Rathi Fight : ઇન્ડિયન પ્રીમિયર લીગ (IPL) 2025ની એક રોમાંચક મેચમાં સનરાઇઝર્સ હૈદરાબાદ અને લખનૌ સુપર જાયન્ટ્સ (SRH vs LSG) આમને-સામને ટકરાયા. આ મેચમાં લખનૌની ટીમે પ્રથમ બેટિંગ કરીને 20 ઓવરમાં 205 રનનો પડકારજનક સ્કોર ઉભો કર્યો. જવાબમાં, સનરાઇઝર્સ હૈદરાબાદ (SRH) ના ઓપનર અભિષેક શર્મા (Abhishek Sharma) એ શાનદાર બેટિંગ કરી હતી, પરંતુ મેચ દરમિયાન લખનૌના બોલર દિગ્વેશ રાઠી (Digvesh Rathi) સાથેની તેમની દલીલે ચર્ચા વધુ જગાવી. આ ઘટનાનો વીડિયો સોશિયલ મીડિયા પર વાયરલ થયો, જેના કારણે આ મેચ ખાસ ચર્ચામાં રહી.

અભિષેક શર્મા અને દિગ્વેશ રાઠી વચ્ચે ગરમાગરમ દલીલ

મેચની એક મહત્વની ક્ષણ ત્યારે આવી જ્યારે લખનૌ સુપર જાયન્ટ્સના બોલર દિગ્વેશ રાઠીએ ઇનિંગની 8મી ઓવર ફેંકી. આ ઓવરના ત્રીજા બોલ પર દિગ્વેશે અભિષેક શર્માને આઉટ કરીને લખનૌને મોટી સફળતા અપાવી. અભિષેક આ સમયે શાનદાર ફોર્મમાં હતો તેથી તેની વિકેટ લખનૌ માટે ખૂબ જ જરૂરી હતી જે દિગ્વેશ અપાવીને ટીમને જીતની આશા જગાવી હતી. વિકેટ લીધા બાદ દિગ્વેશે પોતાનું ખૂબ ચર્ચીત ‘નોટબુક સેલિબ્રેશન’ કર્યું, જે તેની ઓળખ બની ગયું છે. આ ઉજવણી દરમિયાન દિગ્વેશે અભિષેક તરફ કંઈક ઈશારો કર્યો, જેનાથી અભિષેક ભડકી ગયો. આ ઘટનાએ મેચનો માહોલ ગરમ કરી દીધો. અભિષેક ગુસ્સામાં દિગ્વેશ તરફ આગળ વધ્યો અને બંને વચ્ચે શાબ્દિક યુદ્ધની સ્થિતિ જોવા મળી. આ દલીલ એટલી તીવ્ર બની કે અન્ય ખેલાડીઓએ વચ્ચે પડવું પડ્યું. લખનૌના કેપ્ટન ઋષભ પંતે તાત્કાલિક દરમિયાનગીરી કરી અને પરિસ્થિતિને શાંત કરવાનો પ્રયાસ કર્યો. અમ્પાયર્સે પણ હસ્તક્ષેપ કરીને અભિષેકને પેવેલિયન પાછા જવા જણાવ્યું. આ ઘટનાએ મેચને નાટકીય મોડ આપ્યો અને ચાહકોમાં ચર્ચાનો વિષય બની ગયો.

અભિષેક શર્માની શાનદાર બેટિંગ

સનરાઇઝર્સ હૈદરાબાદના ઓપનર અભિષેક શર્માએ આ મેચમાં શાનદાર પ્રદર્શન કર્યું. તેણે માત્ર 20 બોલમાં 59 રનની ઝડપી ઇનિંગ રમી, જેમાં 4 ચોગ્ગા અને 6 શાનદાર છગ્ગાનો સમાવેશ થાય છે. તેની આ આક્રમક બેટિંગે હૈદરાબાદને લક્ષ્યનો પીછો કરવામાં મજબૂત શરૂઆત અપાવી. ચાલુ સિઝનમાં અભિષેકે હૈદરાબાદ માટે 373 રન બનાવ્યા છે, જે તેની ફોર્મ અને ટીમ માટેની મહત્વની ભૂમિકા દર્શાવે છે. જોકે, દિગ્વેશ રાઠીના બોલ પર આઉટ થયા બાદ તેની ઇનિંગ અધૂરી રહી, જે ટીમ માટે નુકસાનકારક રહી.

લખનૌની શાનદાર બેટિંગ

લખનૌ સુપર જાયન્ટ્સની બેટિંગ લાઇન-અપે આ મેચમાં ઉમદા પ્રદર્શન કર્યું. ઓપનર્સ મિશેલ માર્શ અને એડન માર્કરમે પ્રથમ વિકેટ માટે 115 રનની મજબૂત ભાગીદારી કરી, જેના આધારે લખનૌએ મોટો સ્કોર ઉભો કર્યો. માર્શે 65 રનની શાનદાર ઇનિંગ રમી, જ્યારે માર્કરમે 61 રનનું યોગદાન આપ્યું. આ બંને ખેલાડીઓની અડધી સદીએ ટીમને મજબૂત સ્થિતિમાં મૂકી. આ ઉપરાંત, નિકોલસ પૂરને 26 બોલમાં 45 રનની ઝડપી ઇનિંગ રમી, જેમાં 6 ચોગ્ગા અને 1 છગ્ગો સામેલ હતો. આ ખેલાડીઓના યોગદાનના કારણે લખનૌએ 20 ઓવરમાં 205 રનનો પડકારજનક સ્કોર બનાવ્યો, જે હૈદરાબાદ માટે પીછો કરવો એક મોટો પડકાર હતો.

મેચનો રોમાંચ અને વિવાદ

આ મેચ ન માત્ર શાનદાર ક્રિકેટ માટે યાદ રહી, પરંતુ અભિષેક અને દિગ્વેશ વચ્ચેની દલીલે પણ તેને ચર્ચામાં લાવી. દિગ્વેશનું સેલિબ્રેશન અને તેનો ઈશારો અભિષેકને ન ગમ્યો, જેના કારણે આ ઘટના સોશિયલ મીડિયા પર વાયરલ થઈ. આવી ઘટનાઓ ક્રિકેટમાં સ્પર્ધા કેટલી વધી ગઇ છે તે દર્શાવે છે, પરંતુ તેનાથી રમતની ભાવના પર પણ પ્રશ્નો ઉભા થાય છે. ઋષભ પંત અને અમ્પાયર્સની ઝડપી દરમિયાનગીરીએ પરિસ્થિતિને વધુ વણસતા અટકાવી.