‘કોંગ્રેસમાં હોવુ અને કોંગ્રેસના હોવુ એમાં ઘણો ફરક છે’, જયરામ રમેશે શશિ થરૂરનું નામ લીધા વિના તેમના પર કર્યા પ્રહાર
જયરામ રમેશે કહ્યું કે સરકારે પાર્ટી પાસેથી નામો માંગ્યા હતા જે તેમને આપવામાં આવ્યા હતા. સરકારનું વલણ પ્રમાણિક નથી.
- જયરામ રમેશે શશિ થરૂર પર પ્રહારો કર્યા
- કોંગ્રેસમાં હોવુ અને કોંગ્રેસના હોવુ એમાં ઘણો ફરક છે-રમેશ
- સરકારે સંસદનું ખાસ સત્ર બોલાવવું જોઈએ-રમેશ
Jairam Ramesh: આતંકવાદના મુદ્દા પર વિદેશમાં પાકિસ્તાનને ઘેરવા માટે, સરકારે વિવિધ દેશોમાં સર્વપક્ષીય પ્રતિનિધિમંડળો મોકલવાનો નિર્ણય લીધો. આમાંથી એક પ્રતિનિધિમંડળનું નેતૃત્વ કોંગ્રેસના સાંસદ શશિ થરૂરને સોંપવામાં આવ્યું છે. આ મુદ્દા પર રાજકારણ ચરમસીમાએ છે. કોંગ્રેસના નેતા અને રાજ્યસભા સાંસદ જયરામ રમેશે આજે (શનિવાર, 17 મે, 2025) એક પ્રેસ કોન્ફરન્સ દરમિયાન શશિ થરૂર પર પ્રહારો કર્યા અને કહ્યું કે કોંગ્રેસમાં હોવુ અને કોંગ્રેસના હોવુ એમાં ઘણો ફરક છે. જોકે, તેમણે શશિ થરૂરનું નામ લીધું ન હતું.
સરકારનું વર્તન પ્રામાણિક નથી
તેમણે કહ્યું, “સરકારે ચાર નામો માંગ્યા હતા અને અમે તે આપ્યા. પરંતુ સરકારની પ્રેસ રિલીઝ આશ્ચર્યજનક હતી. સરકારનું વર્તન પ્રામાણિકતા દર્શાવતું નથી. સરકાર એક ગંભીર બાબતમાં રમત રમી રહી છે. સરકારની કૂટનીતિ નિષ્ફળ ગઈ છે. આ તકવાદની રાજનીતિ છે. સરકાર ટ્રમ્પને સીધો જવાબ આપવા માંગતી નથી, જેમણે ફરી એકવાર (સાતમી વખત) ભારત અને પાકિસ્તાન વચ્ચે મધ્યસ્થીનો પુનરોચ્ચાર કર્યો છે. સરકારે સંસદનું ખાસ સત્ર બોલાવવું જોઈએ.”
અમે નામ બદલીશું નહીં
જયરામ રમેશે વધુમાં જણાવ્યું હતું કે, “સર્વપક્ષીય પ્રતિનિધિમંડળનું સ્વાગત છે પરંતુ નામો માંગવા અને પછી તેની જાહેરાત ન કરવી એ સરકાર તરફથી અપ્રમાણિકતા છે. અમે ચાર નામોમાં કોઈ ફેરફાર કરીશું નહીં.”
રમત રમાઈ રહી છે
‘સરકાર પર નિશાન સાધતા તેમણે કહ્યું, “કિરણ રિજિજુએ અમારી પાસે ચાર નામ માંગ્યા હતા અને અમે ચાર નામ આપ્યા હતા અને અમને અપેક્ષા હતી કે પ્રતિનિધિમંડળમાં 4 નામોનો સમાવેશ થશે. હવે શું થશે તે હું કહી શકતો નથી, કોંગ્રેસે પોતાની ફરજ બજાવી છે. અમે વિશ્વાસ સાથે નામ આપ્યા હતા કે સરકાર પ્રામાણિકપણે નામ માંગી રહી છે. પરંતુ સરકારનું વર્તન પ્રામાણિકતા દર્શાવતું નથી, એક રમત રમાઈ રહી છે. એક ગંભીર બાબત પર રમત રમાઈ રહી છે. અમે સીધા બેટથી રમી રહ્યા છીએ, પરંતુ અમને ખબર નથી કે સરકાર કયા બેટથી રમી રહી છે.”
